اللعب مع الكبار..

لأول مرة نتحدث معا..فى حوار حقيقى..أخدتها و لاعبتها و قولتلها عايزة اسألك حبة حاجات كدة...

-تفتكرى احنا عايشين ليه؟
-عشان لسة ما متناش!!

-أيوة يعنى طالما ما متناش تفتكرى عايشين ليه بأه؟؟
-عشان ربنا مش عايزنا نموت لية؟؟

-طب يعنى هو ربنا ليه سايبنا عايشين؟؟
-عشان نبقى بنى أدمين..

-يعنى ايه؟؟
-يعنى نلعب و ناكل و تزور صحابنا و نعمل الواجب..و نعيش..و نبقى نونو و بعدين نكبر..

-طب هو انت تعرفى ربنا؟؟
-أيوة..

-منين؟؟شفتيه؟؟
-لأ..بس عارفة انه فوق..و انه شايفنى..

-طب بتحبيه يعنى؟؟
-أيوة..

-ليه طيب؟؟
-عشان هو اللى خلقنى و ادانى حاجات حلوة..

-طب هو بيحبك؟؟
-أيوة..

-و عرفتى منين بأه؟؟
-أصلى ساعات بدعى ان ميار تدخل على الشات عشان أكلها و بتدخل..يعنى ربنا بيحبنى و بيعمللى اللى أنا عايزاه..

-طب و هو انتى عايزة ايه؟؟يعنى لو ربنا هتطلبى منه حاجة هتبقى ايه؟؟
-3 حاجات..أكبر..و أتجوز..و أخلف..

-بس؟؟
-ايوة..هعوز ايه تانى؟؟

-مش عايزة فلوس مثلا؟؟و لا لعب و لا حاجة..
-لا..هاعمل ايه بالفلوس..أنا لسه صغيرة..

-طب لو معاكى فلوس كتير هتعملى ايه؟؟
-ممم...هجيب بيت و أفرشه..و أدى شوية لميار..و ادفع فلوس العملية اللى هاعملها..

-عملية ايه يا بنتى؟؟
-مش أنا هاكبر و أتجوز..و أخلف؟؟؟انتى متعرفيش ان الخلفة دى عملية و بيدفعولها فلوس..

-أه صح!!..طب هى الناس بتتجوز ليه؟؟
-عشان بيحبوا بعض...و عشان يخلفوا..
-طب مينفعش اتنين مش بيحبوا بعض يتجوزوا؟؟
-لأ...مينفعش..

-هيحصل ايه يعنى لو اتجوزوا؟؟
-هيتخانقوا و كل واحد هيروح لحاله..

-يا سلام!طب و لو كانوا بيحبوا بعض و اتجوزوا؟؟؟
-هيتخانقوا برضه و كل واحد هيروح لحاله بس هيرجعوا لبعض تانى و هيخلفوا و يكبروا..

-طب ما ألغبطك شوية...لو بيحبوا بعض أوى أوى يعنى و اتجوزوا؟؟
-يووووووه..قلتلك هيتخانقوا و بعدين يتصالحوا على طوول..بقوللك ايه؟؟أنا عايزاكى تتجوزى واحد بدقن..

-اشمعنا؟؟
-لأ مش قصدى حاجة يعنى..أصل انتى عارفة لما بيجيبوا فى التليفزين واحد بيتكلم عن الدين بيقى يعنى بدقن و طيب..فهمتى؟؟

-أه لو كدة ماشى...طب لو مكانش بدقن؟؟
-خليه بسيب دقنه عشان يبقى طيب..
-حاضر يا ستى..

-طب لو حد بيحب حد يعمل ايه؟؟
-يقوللوا...

-يقوللوه ايه يعنى؟؟
-يقوله أنا بحبك...

-طب و المفروض التانى يرد يقوله ايه؟؟
-يقولله و أنا كمان..

-طب لو مش بيحبه؟؟
-يقولله مش بحبك..بس هو ليه مش هيحبه؟؟؟!

-طب انتى مين أكتر حد بتحبيه؟؟
-ماما و بابا و ميار و محمد و انتى و رانا و عمته و تيتا..

-ليه طيب؟؟
-عشان هم بيحبونى..و بيضحكونى و دمهم خفيف..حتى رانيا لما تتعصب بتبقى لذيذة..و انتى لما بتزعقيلى بتضحكى...و تيتا بتضحك على طول و مش بتكشر..

-طب ايه أكتر حتة بتحبيها؟؟
-البحر..

-اشمعنه يعنى؟؟
-عشان بنمشى فى طريق طويل و احنا مسافرين و بعدين بعد ما اتعب و ازهق ألاقينا وصلنا البحر فهقوم و انبسط..

-طب هو تحبى مين أكتر تروحى البحر و لا تفضلى فى البيت مع صحابك؟؟
-لا أفضل مع صحابى..هروح لوحدى؟!

-طب ايه أكتر حتة بتحبيها؟
-اسكندرية..

-اشمعنه؟؟
-عشان فيها حاجات حلوة و فيها البحر..

-طب بتحبيها فى الصيف و لا الشتاء...
-الصيف طبعا.عشان ببقى مبسوطة و مش بطلب حاجة..حتى الغطا بشيله..

-طب سيادتك عايزة تطلعى ايه لما تكبرى؟؟
-بصى..هى أختى هتتلع رسامة..هتخش كلية الفن دى..و أنا هطلع دكتورة..

-طب مين أكتر واحدة بتحبيها فى صحابك؟؟
-كارين...

-اشمعنه؟؟
-أصلها طيبة أوى و كا مافهمش حاجة تفهمنى..

-طب ايه أكتر حاجة بتكرهيها؟؟
-انى أتخانق مع حد...يووووه أفضل اقول يا رب بكرة مايجيش..

-طب ايه أكتر حاجة نفسك فيها دلوقتى؟؟
-إنى أكبر!!

-عشان تجوزى و تخلفى برضه؟؟
-أيوه عشان ألاقى حد أعيش معاه ولا هاعيش لوحدى؟

-طب مش خايفة تموتى؟؟
-لأ...

-ليه؟؟
-أصل ربنا هو اللى عايز..يعنى لو عايزنى أموت دلوقتى هاموت لو عايزنى أعيش هاعيش..

-يعنى مش خايفة؟؟
-لأ ما هو ربنا عارف..الحلو و بيقول دايما أيوة بيدخل الجنة..و النص نص و بيقول ساعات أيوة و ساعات لأ..بيشوف بأه هيدخل جنو و لا نار..و الوحش بيدخل النار..

-طب و انت مين فيهم؟؟
-معرفش..بس ربنا يعرف..بس أنا بسمع ميار بتدعى إنى أدخل النار و أنا بخاف بصراحة بس بدعى إنى أدخل الجنة..

شكر خاص للأنسة ذات الستة أعوام..فيروز هانم
...


http://www.youtube.com/watch?v=PvQU9Z2lV64