لحد امتى؟؟

خايفة و عشان خايفة هاسكت..مش هسأل عشان يمكن لو سألت أعرف..و يمكن لو عرفت أتضايق..و يمكن أستنى..لكن هاستنى ايه..و ليه..

مش هسأل...

لحد امتى هفضل بضحك و مدارية..و محدش شايفنى بس الكل سامع ضحكتى...

لحد امتى هافضل أشوفك انت و أخاف أبعد...و بدل ما أبعد أحبك..و اشوفه هو..و أخاف أقرب..عشان لو قربت أخاف أحبه..

لحد امتى هفضل أنسى و أسامح..و ليه؟؟..و أقول فى نفسى ما انت كدة قوية..خليتى قلبك نضيف و شلتى منه الكراهية..و امشى فخورة بنفسى و لا حد حاسس من اللى حواليا...

و هافضل شافاك ساعات انت و هى..و عارفة اللى فيها و ساكتة و من كتر ما بحبك مدارية..ما هو لا أنا عارفة أكرهك..و لا ينفعك أتمتدى فى حبك و انت بتبصلها هى..و المشكلة انى حتى مش عارفة أكرهها هى..


و لحد امتى هافضل مستحملاهم يشيلونى همومهم..و هافضل اشيلها كأنها حملى أنا..و يوم ما الهم يكون همى..ألاقى كله بصلى كدة..و قال هى دى بتزعل زينا؟!

لحد امتى هافضل اسمع انت مفيش زيك..فى الطيبة و الحنية..و كأنها دى الشماعة اللى بيعلقوا عليها اللى عملوه فيا..و أنا عشان مردتش و مبينتش الألم اللى فيا..فرحوا انى نسيت و ووفرت عليهم تعب العتاب أو حتى تعب الإحساس بالذنب...فساعتها طبعا أبقى مفيش زيى فى الدنيا ديا!..

و أقول لنفسى اللى بيصبر بينول و لو بعد حين..و أبينلهم انى مش متأثرة أبدا..و أنا قلبى هيموت المسكين..

و لحد امتى هيفضل قلبى يلاعبنى اللعبة ديا..يا يسكت و مسمعلوش حس و أبقى صنم ماشى بالضحكة ديا..يا تجيله حالات غريبة يبقى بيدق جامد و مخوفنى و مش عارفة اسمع حد و لا حد يسمعنى..و أرجع تانى مدارية..

و يعدو حنبى و يسيبونى..أصل هى بنفتكرها وقت القل و التوهان..لكن وقت الفرحة هانساها مع اللى مسحتهم من حياتى فى الفترة ديا...كأنى مضطرة أستحمل..عشان أنا غاوية وجع قلب..يتسندوا عليا و أول ما يفوقوا و يرجعوا يمشوا..يبقى حتى السلام كتير عليا...

و لحد امتى هافضل فى الضل مستخبية..و ورا الحيطة مدارية..مش من حقى أتكلم و لو خطفوا النور من عينية..


و لحد امتى ماطلبش و ماعاتبش..اللى يدهونى أخده و اسكت..عشان أنا حاسة انى أصلا ماستاهلش..بس أنا استاهل على فكرة!!عشان كدة مابقلش..

لحد امتى هافضل خايفة استنى لا اللى استناه مايجيش..و خايفة أقول على أحلامى لا يقولولى ماتناميش..و ده مش من قلة الحيلة..دا أنا يتحايل على الدنيا عشان أعيش..

و لحد امتى هافضل أخاف أطلب لا يخذلونى...أو أشتكى لا يسيبونى..و أخاف أبعد أتنسى..و أخاف أقرب أتإذى..


http://www.youtube.com/watch?v=85oWtqBwa